baukurier — das Magazin der Witschi AG

W wi Witschi

Pedro Lenz, Schriftsteller, Autor und Kolumnist über W wi Witschi

Wahrschiinlech
weiss me wäutwit
wär der Witschi,
was der Witschi,
wi der Witschi
wo der Witschi,
würkt u weiblet,
wirtschaftet u wärchet
widlet u wauzet
wöu we me wohrnimmt,
wöu we me weiss
wi so ne Witschi-Muurer
wi so ne Witschi-Strossebouer,
wi so ne Witschi-Lehrtochter,
wi so ne Witschi-Bürolischtin
wi so ne Witschi-Boufüehrer,
wi so ne Witschi-Chauffeur,
wi so ne Witischi-Maschinischt,
engagiert würkt.

We me weiss u versteit,
wi die au wärtvou wärche,
we me weiss,
wo der Witschi,
was bim Witschi,
wär bim Witschi,
bi Wind und Wätter
wäärchet und widlet,
we me das weiss,
wirds eim warm,
wirds eim wouh
um ds weiche Härz.

D Windjaggen aalege,
d Wasserwoog a d Wang,
der Winku aasetze
und wahrschinlech wieder
aues im Winku
und aues im Sänku
wi mes wott ha, voilà.

Gäng aus genau, genau,
Grüscht genau grichtet,
Garette guet ggöölet,
im Grosse Ganze
gäng guet gschalet,
gäng guet gmässe,
so dass es chli ne Gattig,
gäng e gueti Gattig macht
gäng guet gmacht,
gäng grad u glatt
so geit me gärn go luege,
geit me gärn go grüesse,
geit me gärn go grümschele,
Gneis, Granit, Gummistifu,
uf Grossboustöue
geits gäbig u guet.

Mou di möge muure,
mou di möge meche,
me muess es mou säge,
mit Modulsteine, Mörtu
Muude, Mischöu,
Murerchöue, Murerchessle,
Mässbang, Mässgrät,
Meissu,
millimeterle, ohni z murggse,
methodisch, motiviert,
modern, moderat,
mische, mole, mache,
montiere, manövriere,
mit em Muudekipper,
mit em Mobile,
muesch ders merke.

Dasch der Witschi,
der Witschi wo Wäschbeton verbout
der Witschi wo Wohnige und Wäge bout
der Witschi wo wauzet u wauschtet,
der Witschi wo wärchet u würkt
wo wirtschaftet,
Wohnruum u Läbesruum
bout u bereitstöut,
us Bachstei oder Beton
Prisgünschtig aber nid büuig,
wo der Bouherr
vo Planig bis Bezug begleitet,
Bitume, Brätter, Bordsteine,
Brünne, Badzimmer,
und Brügge bout
Boustöue vo Bützberg
bis Buchsi oder Beitewiiu
bis i Baukan beschtens
bekannts Bougschäft,
botz Bananeboum,
botz Bisiwätter,
botz Boubetrieb.

Witschi,
w wi Witschi,
w wi Wüue,
w wi Wouhfahrt,
w wi wätterfescht,
w wi wärtvou
w wi Witschi
w wi wunderbar
w wi witer so!

Text: Pedro Lenz
Bild: Liliane Holdener

|